स्वास्थ्य बिमाको अवधारणा नै बुझाउन सकिएन : कांग्रेस महामन्त्री थापा

काेसिस न्यूज २ वर्ष अगाडि २ वर्ष अगाडि

काठमाडौँ – परिवर्तन अभियान नेपालले राजधानीको तारकेश्वरमा शनिबार निःशुल्क स्वास्थ्य शिविर कार्यक्रम सम्पन्न गरेको छ . उक्त शिविर कार्यक्रममा बोल्दै नेपाली कांग्रेसका महामन्त्री गगन थापाले स्वास्थ्यलाई मौलिकको रूपमा व्यवहारमा लागु हुन नसकेको बताए ।

कांग्रेस महामन्त्री थापाले भने,‘संविधानमा हामीले स्वास्थ्य मौलिक हक हो भनेर लेख्न त सक्यौँ । तर संविधानमा लेख्न जति सजिलो भयो त्यसलाई व्यवहारमा प्राप्त गर्ने कुरा त्यति नै कठिन भयो ।’ उनले गरिबीबाट बाहिर निस्केर स्वास्थ्यको उपचार खर्चको कारणले फेरि गरिब हुन नपारोस् भनेर स्वास्थ्य बिमा अगाडि सारेको बताए । तर स्वास्थ्य बिमाको अवधारणा नै बुझाउन नसकिएको उनको भनाई छ ।
“स्वास्थ्य बिमाको अवधारणा नै नेपालमा बुझाउन सकिएन प्रधानमन्त्रीलाई पनि बुझाउन सकिएन ,नीति निर्मातालाई पनि बुझाउन सकिएन “थापाले गुनासाे गरे ।

कार्यक्रममा नेपाली कांग्रेस काठमाडौँ सभापति सबुज बानियाँले स्वास्थ्य क्षेत्रमा राज्य संवेदनशील बन्नुपर्ने धारणा राखे । तारकेश्वर नगरपालिकाकी उपमेयर सिर्जना बुर्लाकोटी, समाजसेबि बासुदेब लामा , काठमाडौँ महानगरपालिका वडा नम्बर २६ क अध्यक्ष ख्यामराज तिबारी लगायतको उपस्थिति रहेको थियो । गैरनाफामूलक संस्था परिवर्तन नेपाल अभियानले आगामी दिनमा पनि स्वास्थ्य र शिक्षाको क्षेत्रमा निरन्तर काम गर्दै जाने भट्टले जानकारी दिए ।

‘स्वास्थ्य परीक्षण गरौँ, निरोगी र स्वस्थ जीवन बाँचौँ’ भन्ने नाराका साथ तारकेश्वर नगरपालिका वडा नम्बर ४ स्थित पुरानो गुह्येश्वरी माविमा आयोजित स्वास्थ्य शिविरमा करिब ५ सय जना स्थानीयको निःशुल्क स्वास्थ्य परीक्षण गरिएको अध्यक्ष सुशील भट्टले जानकारी दिए । एसियन मेडिकल स्टुडेन्स एसोसिएसन–नेपालसँगको सहकार्यमा गरिएको निःशुल्क स्वास्थ्य शिविरमा स्थानीयलाई स्वास्थ्य सम्बन्धी परामर्शका साथ स्थानीयको स्वास्थ्य परीक्षणका साथै औषधि वितरण गरिएको भट्टको भनाइ छ ।