बीपी स्मृति दिवसमा कांग्रेसको ‘ग्रीन रन’

काेसिस न्यूज २ महिना अगाडि २ महिना अगाडि

काठमाडौं — नेपाली कांग्रेसका सभापति गगनकुमार थापाले ४४औँ बीपी स्मृति दिवसका अवसरमा आयोजित ‘ग्रीन रन’को शुभारम्भ गरेका छन्।

ललितपुरस्थित यूएन पार्कबाट सुरु भएको ‘ग्रीन रन’ ‘जलवायु जनचेतना जगाउन जुटौँ’ भन्ने नाराका साथ आयोजना गरिएको कांग्रेसले जनाएको छ। कार्यक्रममा हजारौँको सहभागिता रहेको थियो।
दिवसका अवसरमा आयोजित कार्यक्रममा सभापति थापाले क्यानभासमा चित्रसमेत कोरेका थिए। सो अवसरमा सहभागीलाई बिरुवा वितरण गरिएको थियो।

नेपालका प्रथम जननिर्वाचित प्रधानमन्त्री तथा नेपाली कांग्रेसका संस्थापक नेता बीपी कोइरालाको ४४औँ स्मृति दिवस आज देशभर विभिन्न कार्यक्रम आयोजना गरी मनाइँदै छ।

दिवसका अवसरमा कांग्रेसको संस्थापनइतर पक्षले काठमाडौंस्थित नेपाल प्रज्ञा–प्रतिष्ठानमा छुट्टै कार्यक्रम आयोजना गरेको छ।
कांग्रेसका शीर्ष नेताहरूले बीपीले अघि सारेका लोकतान्त्रिक मूल्य–मान्यता, संविधानवाद, नागरिक स्वतन्त्रता र राष्ट्रिय एकताको भावनालाई आत्मसात् गर्दै अघि बढ्नुपर्नेमा जोड दिएका छन्। उनीहरूले बीपीको राजनीतिक दर्शन आज पनि उत्तिकै सान्दर्भिक रहेको बताएका छन्।

प्रत्येक वर्ष साउन ६ गते बीपी कोइरालाको स्मृतिमा विभिन्न कार्यक्रम आयोजना गरी बीपी स्मृति दिवस मनाउने गरिएको छ।

क्याटेगोरी : राजनीति, समाचार