सहकारी अभियानलाई कमजोर बनाउने प्रयास भइरहेको छ : डा. परितोष पौडेल

काेसिस न्यूज ३ हप्ता अगाडि ३ हप्ता अगाडि

काठमाडौं – राष्ट्रिय सहकारी बैंकको बागमती प्रदेश सञ्चालक पदका उम्मेदवार डा. परितोष पौडेलले सहकारी अभियानविरुद्ध योजनाबद्ध रूपमा भ्रम फैलाउने प्रयास भइरहेको बताएका छन् । सहकारी क्षेत्रमा तीन दशकभन्दा बढी समयदेखि सक्रिय पौडेलले पछिल्लो समय सामाजिक सञ्जाल र केही माध्यमबाट आफूलाई लक्षित गरी गरिएको प्रचारप्रति आपत्ति जनाएका हुन् ।

प्रारम्भिक सहकारी संस्थादेखि केन्द्रीय तहसम्म विभिन्न जिम्मेवारीमा काम गरिसकेका पौडेल अहिले सहकारीकर्मीहरूको साझा उम्मेदवारका रूपमा चुनावी प्रतिस्पर्धामा छन् । वित्तीय कारोबार, बचत तथा ऋण व्यवस्थापन र संस्थागत विकासमा लामो अनुभव भएका कारण प्रतिनिधिहरूले आफ्नो पक्षमा सकारात्मक निर्णय गर्ने विश्वास उनले व्यक्त गरे ।
उनका अनुसार निर्वाचन लोकतान्त्रिक अभ्यासको सामान्य प्रक्रिया भए पनि व्यक्तिगत आक्षेप र मिडिया ट्रायल स्वस्थ प्रतिस्पर्धाको हिस्सा हुन सक्दैन । “सहकारी अभियानको मूल उद्देश्य संस्थालाई बलियो बनाउने हो, व्यक्तिमाथि अनावश्यक आरोप लगाएर भ्रम सिर्जना गर्ने होइन,” उनले भने ।
सामाजिक सञ्जालमा उठाइएका आरोपबारे स्पष्ट पार्दै पौडेलले आफूलाई जोडेर फैलाइएका विषय तथ्यहीन रहेको दाबी गरे । उनले नेफ्स्कुनको जग्गा खरिद, भवन निर्माण, कर्जा लगानी वा सफ्टवेयर खरिद प्रक्रियामा आफू संयोजक नरहेको स्पष्ट पारे ।

उनले आफ्नो कार्यकालमा नेफ्स्कुनलाई संस्थागत रूपमा मजबुत बनाउन महत्वपूर्ण योगदान दिएको उल्लेख गर्दै संस्थाको आफ्नै भवन निर्माण सुरु हुनु सहकारी अभियानकै उपलब्धि भएको बताए । “आज नेफ्स्कुन आफ्नै भवनबाट सञ्चालन हुनु सम्पूर्ण बचत तथा ऋण सहकारी अभियानका लागि गौरवको विषय हो,” उनले भने ।
पौडेलले सहकारी बैंकलाई थप पारदर्शी, विश्वसनीय र सदस्यकेन्द्रित संस्थाका रूपमा विकास गर्न आफू प्रतिबद्ध रहेको बताए । आगामी जेठ ९ गते हुने निर्वाचनमा अनुभवी र वित्तीय क्षेत्र बुझेको नेतृत्वलाई साथ दिन उनले प्रतिनिधिहरूसँग आग्रह गरेका छन् ।

क्याटेगोरी : समाचार